ده حمادة وده حمادة تاني خالص

إزدواجية المبادئ عندنا فى مصر جزء من ثقافتنا التى نعنز بها.. كل واحد فينا قادر إنه يسمح لنفسه بحاجات ويمنعها هي هي عن الناس التانية.. طبعاً الإخوان هما ملوك الإزدواجية بس الصراحة كلنا عندنا نفس المشكلة.. حاديكوا أمثلة:

الإستقواء بالخارج..

إتهم الإخوان المسيحيين بالإستقواء بالخارج وإعتبروهم خونة لأنهم بيطالبوا بالتدخل الدولي لمناصرتهم وأيامها الناس كلها قالت على الإخوان إنهم عنصريين.. وشائت الأقدار إن الإخوان يعملوا نفس الحاجة بالظبط والناس كلها تحولت عليهم وقالت إنهم خونة برضه..

التحالف مع العسكر..

فى المرحلة الإنتقالية الكل إعتبر إن الإخوان متحالفين مع العسكر وفى كل حتة كانت الناس بتنادي بسقوط العسكر والإخوان هاجموا كل الناس وحتى ضربوا متظاهرين فى 25 يناير 2012 فى التحرير لما هتفوا ضد العسكر.. ودافعوا عن الجيش بإستموات.. دلوقتي الإخوان بتهاجم الجيش وكل الناس إللى كانت ضد الجيش بقيت بتشجع العسكر.. يعني الطرفين بدلوا الأماكن بتاعتهم بأدق تفاصيلها..

الدفاع عن المقرات..

لما الشرطة ضربوا الثوار فى محمد محمود ومجلس الوزراء.. الإخوان عملوا نفسهم من بنها بل وناس كتير منهم قالوا "إنتوا متخيلين إيه؟ ما هو كان لازم الشرطة تدافع عن مقراتها وده حقهم وما كانش فيه خرطوش.." ولما الجيش ضرب الإخوان عند الحرس الجمهوري كل الناس قالت نفس الكلام على الإخوان..ما هو الجيش لازم يدافع عن مقراته والإخوان هما إللى موتوا بعض..

غلق القنوات..

الإخوان سعوا لغلق قنوات مختلفة وبالفعل نجحوا فى إنهم يقفلوا قناة الفراعين فى وقت من الأوقات وهددوا قنوات دريم وأيامها كل الناس قامت عليهم وهما إستعبطوا.. ودلوقتي العكس بيحصل والإخوان بيسموه قمع والناس شايفين إنه عادي ما هي دي قنوات بتحرض على العنف..

الشرعية..

الإخوان معتبرين إللى الجيش عمله إنقلاب على الشرعية.. فى حين إنهم ما كانش عندهم مانع إن محمد مرسي يصدر إعلان دستوري مخالف لكل الأعراف الدستورية.. وما كانش عندهم مانع إن لجنة وضع الدستور غير قانونية ومرروا بالفعل دستور مغرض بلوي الدراع.. وفى نفس الوقت الناس التانية إللى كانت معترضة على إللى مرسي بيعمله مش شايفين أى حاجة غلط فى إن الجيش يتدخل لعزل مرسي..

الحركة فى الشارع..

الإخوان بيقولوا للناس ليه تنزلوا الشارع وإنتوا عندكوا إمكانية الإطاحة بمرسي فى الإنتخابات.. وهما هما نفس الإخوان إللى نزلوا حاصروا المحكمة الدستورية وضربوا المعارضين فى الشارع مع إن معاهم الحكومة والرئاسة.. وهما نفس الإخوان إللى كانوا شايفين إن نزول الناس الإتحادية ضد القرار الغير دستوري بتاع محمد مرسي غلط بس هما نازلين فى الشارع يتظاهروا ضد السيسي عشان أخد قرار غير دستوري.. وفى نفس الوقت الناس كلها بتقول عادي إللى حصل ده الجيش بينفذ إرادة الشعب ومع على الإخوان إلا الرجوع إلي الإنتخابات..

الأمثلة لا تنتهي لحجم الإزدواجية فى المبادئ إللى عندنا فى البلد دي.. المشلكة إن المقال ده غالباً كل الأطراف حا تشتمني بسببه لأن كل واحد شايف إنه على حق وإن "هذه نقرة وهذه نقرة" ولكن فى وجهة نظري إن المواقف هي هي.. وإن إحنا بنحكم على الأمور بناءً على إللى ينفعنا ويمشي مع أهوائنا مش مع المبدء نفسه..مافيش حد مع الحرية الملطقة للرأي.. وما فيش حد مع الحرية المطلقة للتظاهر.. ومافيش حد ضد إستخدام العنف..